– Vi ventar at årets influensa blir kraftigare enn normalt. Lite influensa siste åra, grunna koronapandemien, gir mindre immunitet mot influensa enn normalt. Vi har og grupper som aldri har vore utsett for influensa, til dømes unge barn, seier kommuneoverlege i Sunnfjord kommune, Øystein Furnes.
Han fortel at dette er ein venta «bieffekt» av smittvernsarbeidet i høve koronapandemien, som gav lite smitte og eksponering mot blant anna influensa.
– Årets influensa kan difor bli kraftigare enn normalt. Det kan føre til at ein blir sjukare, om ein får influensa, seier Furnes.
Er du i ei av risikogruppene? Då bør du vaksinere deg!
Folkehelseinstituttet og Helsedirektoratet er bekymra for vaksinasjonsdekninga, spesielt blant barn i risikogruppene.
Omtrent 1,6 millionar nordmenn er i risikogrupper for alvorleg influensa. Målet er at minst 75 prosent av disse skal få influensavaksine melder Folkehelseinstituttet i ei pressemelding. Av over 81 000 barn i risikogruppene nasjonalt fekk berre 8 prosent influensavaksine i fjor.
– Er vi flinke i vårt område til å ta influensavaksine?
– Vi ser stor auke i talet som vaksinerer seg mot influensa, spesielt for dei over 65 og hos helsearbeidarar, seier han.
For vaksne med risikofaktorar for alvorleg sjukdom, ligg vi lokalt på rundt 75 prosent dekning. Det er høgt, tilsvarande tal nasjonalt ligg rundt 60 prosent. For barn med risiko for alvorleg sjukdom, ligg vi for lågt også lokalt, seier Furnes.
Furnes fortel at for folk fleste går det fint om ein får influensa., men dei som tilhøyrer ei risikogruppe bør vaksinere seg.
– Barn og vaksne med risikofaktorar for alvorleg sjukdom bør vaksinere seg, og folk over 65 år. Helsearbeidarar bør også ta vaksinen, for å førebygge spreiing av smitte. For risikogruppene reduserer vaksine risiko for alvorleg sjukdom. Det er viktig når ein har låg immunitet i befolkninga og ventar ein kraftig influensa. For tidleg fødde barn, spesielt før veke 32, bør også vaksinerast, seier Furnes.
Årets influensavaksinering i Sunnfjord kommune
Bestilling av influensavaksine i Sunnfjord kommune i haust
Influensavaksine er tilgjengeleg hos fastlegen frå veke 43 for personar som er i risikogruppa. Dei som ikkje er i risikogrupper kan få vaksine via resept frå fastlegen sin, eller ved å gå på apoteket og få sett vaksinen der.
Det er forventa at årets influensaepidemi kjem til å bli kraftigare enn dei tidlegare åra, grunna endringar i sirkulerande virus og lågare immunitet i befolkninga etter at det førre sesong knapt vart registrert influensa i landet.
Vaksinasjonskveldar på Førdehuset
Desse kveldane er reservert personar som er i risikogrupper. Andre som ønskjer vaksine kan få det enten via fastlegen sin eller ved å gå på apoteket. Sjå risiko- og målgruppene
- Tysdag 8. november kl. 15.00 – 20.00
- Tysdag 15. november kl. 15.00 – 20.00
Det er plass til ca. 500 personar kvar kveld.
Bestill vaksinasjonstime på Førdehuset
Vaksinasjon ved Førde, Naustdal, Sande og Jølster legesenter
Det vert sett av tid for vaksinasjon på dagtid der du får tildelt time av våre medarbeidarar. Dersom du har time hos fastlege i aktuelle periode kan du få vaksine ved denne konsultasjonen.
Bestill time til vaksinasjon ved:
- Førde legesenter: telefon 577 22 150 eller via Helsenorge.no
- Naustdal legesenter: telefon 578 16 020 eller via Helsenorge.no
- Sande legesenter: telefon 577 18 240, eller via Helsenorge.no
- Jølster legekontor: telefon 577 26 250
Kven bør vaksinere seg
Nær 1,6 million menneske i Norge tilhøyrer grupper med auka risiko for alvorleg influensasjukdom.
Personar i følgande risikogrupper bør ta influensavaksine årleg:
- Bebuarar i omsorgsbustad og sjukeheim
- Alle frå fylte 65 år
- Gravide etter 12. svangerskapsveke (2. og 3. trimester). Gravide i 1. trimester med anna tilleggsrisiko skal også få tilbod om influensavaksine
- Prematurt fødte barn, særleg barn født før veke 32 i svangerskapet, frå 6 månader (kronologisk alder) til 5 år
- Born og vaksne med:
- kronisk lungesjukdom (inkludert astma),
- hjarte- og karsjukdom (anna enn velregulert høgt blodtrykk),
- diabetes type 1 og 2
- leversvikt eller nyresvikt
- kronisk nevrologisk sjukdom eller skade, spesielt personar med nedsett lungekapasitet og/eller hostekraft
- nedsett immunforsvar som følge av sjukdom eller behandling av sjukdom (til dømes organtransplanterte, kreft, HIV, reumatoid artritt og andre sjukdommar)
- Særs alvorleg fedme (KMI over 40)
- anna alvorleg og/eller kronisk sjukdom der influensa utgjer ein alvorleg helserisiko, etter individuell vurdering av lege (Til dømes personar med medfødde kromosomavvik, genetiske syndrom og samansette kromosomavvik som ikkje er klassifisert annan stad)
I tillegg tilrådast influensavaksine til:
- Helsepersonell og andre tilsette i helse- og omsorgsteneste som har nær kontakt med pasientar ved behandling eller pleie
- Personar som bur saman med (eller er tilsvarande nære) immunsupprimerte
- Svinerøktere og andre som har regelmessig kontakt med levande griser
- Saneringspersonale og andre som jobbar med mistenkt eller bekrefta influensasjuk tamfugl.
Les meir om: Influensavaksinasjonsprogrammet
Influensaen kjem truleg rundt juletider
– Har ein merka noko til årets influensa her lokalt?
– Vi har ikkje registrert teikn til auke, og reknar med at influensaen slår til rundt juletider, seier Furnes.
Influensavaksine blir distribuert denne veka. Frå og med neste veke kan ein få vaksine, om ein har time ho fastlege.
– Det blir tilbod om massevaksinering i Førdehuset 8.- og 15. november. Dei som ønskjer å ta vaksinen kan bestille tid på sunnfjord.kommune.no. For dei som er i risikogrupper blir prisen på vaksinen rabattert. Vi prøver å halde prisen så låg som råd, på 100 kroner. For andre vil normal pris gjelde, seier Furnes.
– Kva er di anbefaling?
– Om du tilhøyrer ei risikogruppe, er helsearbeidar eller over 65 år, ta influensavaksina.
– Og for folk flest?
– Det er inga tilråding om å ta influensavaksine for friske folk, men vaksinen er heilt trygg, og alle som ønskjer å ta den kan gjere det. Risikoen for alvorleg sjukdom som følge av influensa er veldig låg hos friske folk.
Fleire år med koronapandemi har gjort folk flest gode på smittevern fortel Furnes. Han seier at det er vanlege råd om smittehygiene som gjeld: Hald avstand, vask og sprit, hald deg unna folk om du har symptom.
– Det blir ikkje karantene og isolasjon, som under koronapandemien, seier han og fortel at ein positiv bieffekt av koronapandemien.
– Folk har blitt flinke til smitteførebygging sidan pandemien varte så lenge. Det håpar eg vi held fram med, seier han.
Medisinutdanning til Førde lét vente på seg. Men alt håp er ikkje ute
Endring ved Førde legesenter: – Fordelen er at alt er på ein plass
