– Eg har sagt i fleire månadar at ein må rydde i elveløpet. No er elva full av is og har tetta seg, og no renn vatnet ut over heile campinga.
Det seier campingdrivar Inge John Johnsen fortvilande. I løpet av onsdagen har han vore vitne til naturkreftene som sakte, men sikkert har teke over campingplassen på Reed.
– Sørgeleg
– Vatnet går ut over heile plassen og inn i hyttene. Det er sørgelege greier, seier han.
Han seier han ikkje har opplevd liknande. Onsdag ettermiddag var folk frå kommunen på plass, og hadde byrja å flytte campingvogner som står i fare for å bli skadd av vassmengdene.
– Eg har gjort det eg kan gjere, og no er eg lei, seier Johnsen.
Han fortel at det ikkje er sterk straum i elva, og at vassmengdene per no ikkje har kome bort til campingvognene.
Sjå vatnet fosse innover campingplassen
Uroa for at elva skal vekse meir
Han seier han har vore i kontakt med kommunen og bedt om opprydding i elveløpet, men ingenting har skjedd.
– No er her folk frå kommunen, men det hjelper lite. Det skulle ha vorte gjort noko då det var kaldt, seier han og held fram:
– Det er ikkje så mykje meir vi kan gjere no.
Runar Kleppe er brann og beredskapssjef i Gloppen kommune. Han seier at det er NVE som har ansvar for elveforbygging, som er tiltak som sikrar at vatn i vassdrag held seg i sitt opphavlege løp og ikkje fløymer over omgjevnadane.
– Det er ikkje mykje vi kan gjere no. Vi har vore i kontakt med NVE.
Det sa brann- og beredskapssjef Runar Kleppe i Gloppen kommune litt over klokka fire onsdag ettermiddag.
Han var sjølv til stades på Reed Camping og var med å evakuere campingvogner som stod i fare for å bli skada av vassmengdene.
Like over 17.00 løsna isproppen, og situasjonen er no avklara.
Store mengder is på plassen
– Det ser ikkje ut som at det har kome vatn inn i vognene, men vatnet står heilt opp under hjulbogane til nokre av vognene, sa han til Firda medan det heile stod på.
Han fortalde at store mengder is tetta elveutløpet som igjen førte til at vatnet rann utover heile området til campinga.
– Kva skal de gjere vidare?
– Det er ikkje mykje vi kan gjere. I kanten av plassen er det farleg å gjere noko. Det er så mange meter med is her og byrjar ein å grave på isen risikerer vi at det kjem meir is over på plassen. Vi får berre håpe at det byrjar å renne frå iskanten og nedover og at det byrjar å løyse seg opp.
– Vatn renn utover heile campingplassen
Vil følge situasjonen
Inge John Johnsen eig og driv Reed Camping. Han er fortvila over situasjonen, og meiner kommunen burde har rydda i elveløpet for lenge sidan.
Til det svarar Kleppe at det er NVE som har ansvar for elveforbygging.
– Eg skjøner godt at han er fortvila. Under storflaumen stod plassen under vatn, så eg skjøner at det er ein fortvilande situasjon.
Kommentarer til denne saken