Kjenner ikkje årsaka til fjøsbrannen på Reed
EKSPLOSJONSARTA: Berre mur-delen sto att av fjøsen der 500 griser brann inne. Foto: Helge Johnsen
Politiet har enno inga meining om årsaka til fjøsbrannen der 500 grisar brann inne på Reed natt til laurdag.
Men brannen har vore eksplosjonsarta, seier lensmann Nils Ove Roset i Gloppen til Firda.
- Når det først skulle gå gale, var det likevel ei lukke at brannen ikkje spreidde seg Gordon Hotell og resten av husklyngja like ved fjøsen. I så fall, ville vi stått overfor ei katastrofe, seier Roset til Firda.
Overtent
Brannen vart oppdaga i 02.30-tida, og fjøsen var overtent før brannvernet frå Byrkjelo og seinare også frå Sandane kom fram til staden.
Alle dei 500 grisene i fjøsen i Reed sentrum gjekk tapt i dyretragedien i Gloppen.
Brannmannskapa måtte også kjempe for å hindre spreiing til nabolåven der det stod storfe. Eine låveveggen brann, men dyra som stod i denne fjøsen, kom ikkje til skade.
Gordon Hotell ligg berre 25 meter frå denne låven.
-Flammane stod førti meter til vêrs då vi kom. Heldigvis gjekk gneistregnet slik at det ikkje trefte husa i nærleiken. Det er berre tilfeldig at denne brannen ikkje ende langt verre, seier brannmeister Bjarne Kleppe til Firda.
Farlege takplater
Brannen førte ikkje til skade på korkje menneske eller bustadhus i nærleiken. Politiet rykte ut med politipatrulje og lensmann til brannstaden, der brannvernet bruke ein times tid på å få elden under kontroll. Seinare gjekk det føre seg ettersløkking til rundt ti-tida laurdag føremiddag, og ei gravemaskin reiv takplater ned i branntomta for å hindre at dei skulle flyge av stad i den sterke vinden.
I tillegg til brannmannskap vart også sivilforsvaret varsla.