Eplesaft frå Balestrand på verdas største matmesse

Artikkelen er over 18 år gammel

Når folk besøker Norge si utstilling på matmessa i Berlin, er det edle epledropar frå Balholm Safteri dei blir ønska velkomne med.

DEL
Safteriet i Balestrand er einaste bedrifta frå Sogn og Fjordane som er representert på matmessa i Berlin - som er den største i verda i sitt slag.

– Eg ser først og fremst på det som ei ære at vi er representert på messa, seier dagleg leiar Åge Eitungjerde til Firda.

I går klargjorde han to pallar med tilsaman 360 flasker med eplesaft frå det vesle safteriet i Balestrand for turen nedover til Tyskland.

Matmessa "Grüne Woche" i Berlin varer frå 19.-28.januar, og blant dei som skal vere til stades frå Norge er landbruksdepartementet, med landbruksminister Bjarne Håkon Hanssen i spissen.

–Norge skal vise fram ulike gardsmat-produkt, såkalla nisje-produkt, på messa, og safta frå Balholm Safteri blir velkomstdrinken til dei som kjem og besøker den norske utstillinga, fortel Eitungjerde.

– Korleis har de seg at produkta dykkar hamnar på denne messa?

– Det har nok med å gjere at produktet vårt har vore representert på den gamle skysstasjonen på Fausko i Hemsedal, og han som driv denne - Knut Fausko – har vore med i komitéen som skulle velgje ut dei norske produkta til matmessa.

Artikkeltags