Kl. 10.48 tysdag 16. oktober fekk politiet melding om at to bilar har kollidert ved Stedjebrua i Sogndal. Uhellet har skjedd like ved rundkøyringa der ein kan køyre mot Fjærland. Den eine bilen skal ha køyrt på den andre bakfrå og airbag er utløyst i den eine bilen.
Alle er ute av bilen og naudetatar er på plassen, melder politiet.
Tre personar er involverte.
– Ein mann i slutten av 60-åra opplyser å ha smerter i ryggen. Han vert sendt til legevakt for ein sjekk. Dette er den einaste personskaden eg har fått opplysningar om akkurat no, seier operasjonsleiar Frode Kolltveit i Vest politidistrikt til Firda. Han har ikkje fått melding om at uhellet påverkar trafikken i sentrum.
Kl. 12.00 melder politiet at bilbergar har henta begge bilane. Vegen er no open for normal ferdsel. Det vert oppretta sak.