Sogn og Fjordane får Fylkesmannen
STATENS HUS: Hermansverk i Leikanger kommune kan framleis kome til å bli fylkesmannssete. Foto: Arne Stubhaug
POLITIKK: Alt tyder på at hovudsetet for den felles Fylkesmannen for Hordaland og Sogn og Fjordane blir lagt til vårt fylke. Klokka 11 blir det halde allmøte for dei tilsette i Statens Hus på Hermansverk.
På dette møtet er det venta at avgjerda om den framtidige fylkesmannslokaliseringa kjem til å bli presentert.
Også i Bergen skal det haldast allmøte hos Fylkesmannen. Men ifølge ein presseinvitasjon Regjeringa har sendt ut, skal statssekretær Kristin Holm Jensen frå Kommunal- og moderniseringsdepartementet delta på allmøtet på Hermansverk, og dette møtet skal overførast via video til allmøtet i Bergen.
Eit slikt opplegg betyr normalt at dei beste nyhenda og gladmeldingane i dette høvet først og fremst vil gjelde Hermansverk og Sogn og Fjordane.
Firda kjem tilbake med meir.