– Det var på éin måte overraskande, men veldig interessant og spennande. Det er 17 år sidan eg var statssekretær i Justis- og politidepartementet. Så det var veldig kjekt å få telefon frå Trine Skei Grande i går, seier Hamar.

Som statssekretær blir han den politiske høgrehanda til Klima- og miljøministeren og del av leiinga i departementet.

Partileiarane Erna Solberg (H), Siv Jensen (Frp) og Trine Skei Grande (V) presenterte denne onsdagen ministerpostane i den nye regjeringa med Venstre.

Hamar har lang fartstid i politikken. Han har sete som direktør for Lotteri- og stiftelsestilsynet sidan 2000.

Les også: Sveinung Rotevatn blir statssekretær for Syvli Listhaug (Frp).

Lokka tilbake i politikken

Kvifor gjer du politisk comeback?

Regjeringsarbeid er veldig spennande. Ein får utøve politikk, forme politikk og legge fram saker til Stortinget. Ein får sjansen til å bety noko, og ikkje minst så veit eg kor eg kjem frå: eg kjenner fylket som eg bur i og har representert tidlegare, seier han.

Hamar har politisk fartstid frå 1987. Mellom anna har han vore leiar i Unge venstre, politisk sekretær i Venstre, politisk rådgivar i Samferdselsdepartementet og både politisk rådgivar og statssekretær i Justis- og politidepartementet.

Ny konstituert direktør

Han reiser til Oslo torsdag kveld, og kjem til å vekependle til Oslo framover. Inn i direktørstillinga hans på Lotteritilsynet kjem Bjørn Morten Øen.

– Eg har rett på å komme tilbake i stillinga når eg er ferdig med perioden. Men departementet skal konstituere ein ny direktør i mitt fråvær. Det blir inntil vidare Bjørn Morten Øen, seier Hamar.