Arne Osland er ny styreleiar for Førdefestivalen

TRADISJON: Førdefestivalen har blitt arrangert sidan 1990. På nyåret tar Arne Osland over som styrleiar, etter at Tonje Winje gjekk av etter eige ønskje.

TRADISJON: Førdefestivalen har blitt arrangert sidan 1990. På nyåret tar Arne Osland over som styrleiar, etter at Tonje Winje gjekk av etter eige ønskje. Foto:

KULTUR: Arne Osland er utnemnd til ny styreleiar for Førdefestivalen frå 2019. – Eg er klar til å spisse øyra og vere med på laget.

DEL

– Oppgåva blir å vidareutvikle profilen som har vorte skapt dei åra Hilde Bjørkum har vore direktør, seier Osland i ei pressemelding.

Han ser fram til å ta fatt på vervet som styreleiar for Førdefestivalen, og leie festivalen inn i ein ny fase med Per Idar Almås, som vart ny direktør i oktober 2018.

Osland er utviklingsdirektør ved UWC Red Cross Nordic i Flekke, og er utnemnd til styreleiarvervet av Sogn og Fjordane fylkeskommune for ein periode på 2 år. Han finn det særleg motiverande at festivalen er ein møteplass for lokale musikkuttrykk med heile verda som horisont.

– På det område kjenner eg at erfaringa mi frå UWC kjem til sin rett. Akkurat som Førdefestivalen, er vi i UWC opptekne av å finne fram til og dyrke kvalitet som ikkje er bunde av kommersielle omsyn, seier han vidare i pressemeldinga.

Førdefestivalen er Skandinavias største festival for akustisk verdsmusikk. Om lag 300 artistar frå heile verda vert presentert frå 30 scener gjennom 80–100 ulike festivalarrangement for om lag 26.000 besøkande kvart år.

– Førdefestivalen løftar fram musikalske skattar på folkemusikken sine eigne vilkår, og folkemusikk er noko eg har vorte meir og meir glad i både som formidling av tradisjon, men også som ei form som gjev godt rom for innovasjon. Eg er klar til å spisse øyra og vere med på laget og håpar å kunne gjere mitt til å gje Førdefestivalen ei retning, seier Osland.

Osland har master i skandinaviske språk og skandinavisk litteratur frå Universitetet i Oslo, og før han kom til Flekke, var han fleire år lærar ved UWC Atlantic College i UK. Han sit i styret for FN-sambandet og er også med i kommunestyret i Fjaler.

Styret for Førdefestivalen har frå 2019 slik samansetjing:

Arne Osland, styreleiar (vara: Liv Judit Straume)
Gunn Åmdal Mongstad (vara: Jakob André Sandal)
Johan Kåre Kjerstad (vara: Anne Kristin Lilleaasen)
Trude Skarvatun (vara: Trond Ueland)
Christoffer Knagenhjelm (vara: Magnus Hope)
Dagfrid Vallestad Brevik (vara: Oda Heidi Bolstad)
Ingrid Heieren (vara: Signe Eimhjellen Mehl).

Artikkeltags