Naustdalstunnelen blei torsdag kveld stengd ei lita stund. Det takka vere ein syklist som har trassa skiltinga om at det ikkje er lov å sykle i tunnelen.

Det stadfestar trafikkoperatør John Andreas Omdal i Vegtrafikksentralen Vest.

Tunnelen er no opna att.

Får ti minutt

Omdal fortel at når det blir ringt inn meldingar om syklistar i tunnelar, så har dei ikkje anna val enn å stenge.

– Dei kan vere utan refleks, og kome brått på for bilistar som ikkje ventar å møte syklistar, forklarer han.

Men om du skulle gjennom Naustdalstunnelen, kunne Omdal roe med at stenginga ikkje ville vare så lenge:

– Han var midt i tunnelen då meldinga kom, så han får ti minutt på å kome seg ut, seier Omdal.

Liten sjanse for å bli teken

Trass i at det ikkje er lov å sykle i tunnel, så er det ifølge Omdal sjeldan at det endar i bøter. Det kjem av at syklistane ofte er ute av tunnelen før politiet kjem fram. Men om politiet treffer på deg i ein tunnel der det ikkje er lov å sykle, så kan du rekne med ei bot ifølge Omdal.

– Men då skal du ha litt uflaks, seier han.

Trafikkoperatøren rår til at ein ikkje syklar i tunnelane, men heller syklar rundt der det er mogleg.