– Føraren er vaken og medviten, seier Ole Ronny Olsen, operasjonsleiar i Vest politidistrikt.
Politiet melder torsdag føremiddag, kring 11.20, om ei trafikkulykke med motorsykkel i Sogn, på fv. 55 Lustravegen.
Olsen fortel at motorsyklisten skal ha hamna i grøfta. Ambulanse er på staden, og føraren får tilsyn frå helsepersonell.
– Det er meldt at vedkommande blør frå ansiktet, seier Olsen.
Då Firda snakka med operasjonsleiaren klokka 11.30, kunne han fortelje at politiet snart er framme ved staden.
Uhellet skal ha skjedd på Hafslo, ifølge politiet. Vegtrafikksentralen Vest melde først at ulykka skjedde ved Viki camping, men retta dette til krysset til fv. 5640.
Vest politidistrikt melder rett før 12 at bilbergar er bestilt og på veg til staden.
12.27 melder politiet at føraren er køyrd til Førde sjukehus for sjekk. Det er ingen mistanke om ruskøyring, og vegen er opna. Naudetatane avsluttar på staden og politiet opprettar sak.