Sogn Avis skriv tysdag morgon at ein mann i 60-åra er sakna i Lærdal.

– Det vart sett i verk ein redningsaksjon då ein mann i 60-åra er meldt sakna i Lærdal. Han er sist sett søndag kveld, opplyser operasjonsleiar i Vest politidistrikt, Stine Mjelde, til Sogn Avis.

Ifølge avisa kom meldinga til politiet frå ein innringjar klokka 21.58 måndag kveld.

– Det har vorte leita gjennom natta. Røde Kors, Norske Redningshunder og ei elveredningsgruppe deltek. Det har Ikkje kome nye opplysingar i løpet av natta og vi har bede om bistand frå Sivilforsvaret, seier Mjelde.

Den sakna er busett i Lærdal. Mannskap i frivillige organisasjonar som deltek i aksjonen har oppmøte på plassen ved sidan av Statens vegvesen sitt bygg på Grandane, skriv avisa.

– No vil det bli utskifting av ein del mannskap og det vil bli gjort opp status på kor mykje mannskap ein har tilgjengeleg gjennom dagen, seier Mjelde.

– Sist sett ved ei hengebru

Firda får opplyst av Vest politidistrikt at den sakna mannen var sist sett ved ei hengebru, ved Ljøsne i Lærdal.

– Mannen var sist observert ved ei tynn hengebru i Ljøsne. Vi held alle moglegheiter opne på dette tidspunkt. Vi veit ikkje om mannen var på fjelltur eller om han reist vekk utan å melde frå, seier Jørgen Ommedal, i Vest politidistrikt.

– Vi jobbar no med å bytte mannskapet, slik at vi får friske krefter inn i søket etter mannen, seier han.

Har du tips i saka? Kontakt politiet på telefonnummer 02800.