På Høgre sin strategikonferanse på Sundvollen i helga la Erna Solberg fram tolv konkrete forslag som vil auke kraftproduksjonen fram mot 2030. Det skriv Høgre i ei pressemelding søndag ettermiddag.
Blant desse finn vi industrikraftutbygginga i Snøheia mellom Høyanger og Sunnfjord kommune.
– I den situasjonen vi er i no, bør vi ikkje vente med å bygge ut fase 1 og 2 på sørlege Nordsjø II. I tillegg må prosjekt som Trollvind og Snøheia Industrikraft raskt realiserast. Begge prosjekta kan vere i produksjon i 2027 dersom dei får konsesjon, seier Solberg.
Bakgrunnen er Statnett som før nyttår sende klåre åtvaringar til Olje- og energidepartementet om at Norge styrar mot eit effekt- og kraftunderskot innan få år. Dette kan i verste fall føre til utkobling av forbruk.
Pressesjef Cato Husabø Fossen i Høgre presiserer overfor Firda at partiet i den same tiltaksplanen seier dei vil «gjennomføre endringar i plan- og bygningslova som gir kommunane ei hand på rattet i plasseringa av nye vindkraftverk».
– Altså blir summen her at Høgre meiner Snøheia bør byggjast ut så raskt som mogleg, dersom kommunane seier ja, seier Fossen.
Harry er grunneigar på Snøheia: – Eg kjem aldri til å signere, uansett kor mykje pengar dei kjem med
