Samstemt Ap-kvartett: – No er målet å bli Sunnfjords største parti

STÅR SAMLA: Arne Sandnes (Jølster), Reidar Fugle Nordhaug (Førde), Sara-Marie Horsevik (Gaular) og Håkon Myrvang (Naustdal).

STÅR SAMLA: Arne Sandnes (Jølster), Reidar Fugle Nordhaug (Førde), Sara-Marie Horsevik (Gaular) og Håkon Myrvang (Naustdal). Foto:

Artikkelen er over 2 år gammel

SUNNFJORD: Dei avtroppande Ap-leiarane i Førde, Jølster, Naustdal og Gaular var onsdag kveld samstemte om samanslåinga til Sunnfjord Ap. – Vi skal bli det største partiet i den nye kommunen.

DEL

Fire Ap-lag er lagt ned og blei onsdag til Sunnfjord Ap under stiftingsmøtet i Festsalen i Førdehuset. Dei fire avtroppande leiarane fortel om ein samla organisasjon, og at dei fire laga tidleg bestemte seg for å bli eitt partilag.

– Vi har vore klare frå dag ein på at vi er samla. Vi hadde eit felles styremøte i alle fire laga allereie i oktober i 2016, seier Sara-Marie Horsevik, som var leiar av Gaular Ap.

Håkon Myrvang, ordførar i Naustdal og avtroppande leiar av Naustdal Ap er einig.

– Vi har vore veldig samstemte heile vegen, og har mykje å bygge på no når vi går vidare samla.

Reidar Fugle Nordhaug, som var leiar i Førde Ap, fortel at medlemmene i laget har vore positivt innstilte til samanslåinga.

– Eg har opplevd ei positiv stemning. Vi har hatt ein konstruktiv prosess i laget for korleis vi skal få dette til, seier han.

NYSTIFTA: Stiftingsmøtet for Sunnfjord Ap.

NYSTIFTA: Stiftingsmøtet for Sunnfjord Ap. Foto:

– Meir slagkraftig

Dei fire avtroppande leiarane har tru på at det blir lettare å drive valkamp samla.

– Det blir ein heilt annan måte å drive politikk på. I Gaular har vi har vore ei lita gruppe med aktive medlemmar som har drive valkamp. No til neste kommunevalkamp blir det lettare å nå ut til folk, seier Horsevik.

Dei ser fram til å bygge ein meir slagkraftig partiorganisasjon.

– No blir vi eit større parti i ein ny storkommune. Med så mange medlemmar kjem vi i ein gunstig posisjon, seier Myrvang.

Nordhaug har trua på at Sunnfjord Ap skal kunne gjere det godt ved neste kommuneval.

– Om ein tel med AUF-medlemmene, så er vi no ein organisasjon på 370 medlemmar, og blir partiet sitt senter i fylket. Når vi er så mange, blir det enklare å få fleire medlemmar. Vi får ein enorm valkamporganisasjon, og har trua på at Arbeidarpartiet etter valet blir det største partiet i den nye kommunen, og at vi får ordføraren, seier han.

Utfordringar

Men dei avtroppande leiarane ser også utfordringar for det nye Ap-laget.

– Vi blir eit stort parti i ein stor kommune. Det kan bli utfordrande å få engasjert medlemmane utanfor Førde sentrum. Det blir langt å køyre om møta skal vere her. Her må vi finne løysingar i partiet som gjer at folk er med oss, fortel Arne Sandnes, som leia Jølster Ap.

– Det blir ein ny organisasjon og nye rutinar. Veldig mykje arbeid for dei nye tillitsvalde, men vi har trua på at vi skal få dette til, seier Nordhaug.

Artikkeltags

Kommentarer til denne saken