- Slik Roger Aa Djupvik gjekk i dag, er det vel ingen tvil om at han forsvarer ein plass på det norske verdscup-laget, konkluderer krinslagstrenar Nils Heggdal etter at hyaren sette samtlege norske løparar til veggs på Sjusjøen fredag ettermiddag.

Fall i siste sving

- Alle dei beste løparane i Norden, minus deltakarane i «Tour de Ski» deltok på Sjusjøen, seier Nils Heggdal og viser til at fellesstarten over 15 kilometer i klassisk stil vart eit realt bikkjeslagsmål mellom Roger Aa Djupvik og Vasalopp-eksperten Martin Larsson.

- Aa Djupvik stakk frå feltet eit stykkje føre mål, og såg ut til å gå mot ein klar siger. Men i den siste svingen gjekk han plutseleg overende og dermed gjekk Larsson forbi han. Men nordfjordingen kom seg raskt på beina att, og kom seg i mål før dei andre norske løparane, seier Nils Heggdal.

Verdscup-søknad

Og med alle dei nestbeste norske løparane til stades, meiner krinslagstrenaren Nils Heggdal at Aa Djupvik har lagt inn ein god søknad med tanke på fleire verdscup-startar utover vinteren.

- No er det vel først NM i Meråker, før verdscup-sirkuset med norske løparar set kursen til Otepãã. Og i dag var det vel ingen tvil om at Aa Djupvik nok ein gong var det store namnet, seier Heggdal.

Bortsett frå Aa Djupvik, vart det eit stykkje fram for dei andre lokale løparane under fellesstarten på Sjusjøen. Men trioen André Haugsbø, Bjarne Nes og Asgeir Årdal gjekk seg likevel alle inn blant dei 40 beste i norgescup-løpet.

Bra av Gaasø

- Dessutan leverte 16-åringen Trygve Henden Gaasø frå Fjellhug/Vereide eit godt løp i 16-årsklassa. Sjølv om han gjekk overende, gjekk han seg inn til ein sterk 20. plass i ei tøff aldersklasse, seier Heggdal.

Allereie laurdag vert det arrangert sprint på Sjusjøen, medan det vert gått fri teknikk på søndag.

- Løpet på fredag var ikkje ein del av den Skandinaviske cupen, men både sprinten og fri teknikk-delen på søndag er ein del av denne attraktive cupen, seier Nils Heggdal.