Fekk 2. plass i NM
Norvald Haaland frå Flekke vart i helga nummer to i NM i roadracing. - Eg er ikkje heilt nøgd når eg berre vert nummer to, seier 34-åringen.
Den norske meisterskapen i roadracing vert avvikla ved at løparane køyrer fem løp gjennom sesongen, og så tel opp samanlagt kven som har best poengsum.
Eitt utan poeng
- Difor var det ergerleg at eg i år har hatt eit løp utan poeng i det heile. Så når Helge Spjeldnes frå Solør gjennomførte alle løpa med gode plasseringar, var det umogleg for meg å passere han i samandraget etter NM-finalen, seier Haaland.
I helgas avsluttande finale-konkurranse vart Haaland også nummer to, bak NM-vinnaren Helge Spjeldnes frå Solør.
Neste år
Haaland konkurrerer i klassa «Superstock 600».
- Dette er ein «600-kubikkar» med noko lettare modifisering. Vi er vanlegvis ein 24-25 løparar i kvar konkurranse, og det er ein populær klasse, seier Halland.
I poengsamandraget etter dei fem rundane stoppa Spjeldnes opp på 97 poeng, medan Norvald Haaland hadde 86.
- Eg får håpe at eg kan gjere det skarpare neste år. NM-finalen på Vålerbana i helga var årets siste løp, seier Haaland som for tida er busett i Moss i Østfold.
|
|
Utskriften er kun til privat bruk og kan ikke benyttes på annen måte.
Kopiering eller spredning av innholdet krever avtale med rettighetshaver eller Kopinor.
