Vegar Gjermundstad har hektiske dagar for tida. Den siste veka har han prøvespelt for Syrianska i Södertälje ved Stockholm, før han søndag ettermiddag var på veg til tilsvarande opplegg i Hønefoss.

- Ja, det går slag i slag. Og eg må nytte sjansen no medan eg har den, seier vaimingen.

Svar i veka

Gjermundstad har gode opplevingar frå opphaldet i den svenske klubben, men er usikker på om han får tilbod om kontrakt.

- Eg har fått gode tilbakemeldingar både frå treningar og kamp. Men ein veit jo aldri i dette gamet, seier Gjermundstad som spelte to kampar under Sverige-opphaldet.

I den første kampen heldt vi nullen defensivt, medan det vart 2#<\a>2 mot den finske klubben Åbo på laurdag, fortel Gjermundstad som vart skifta ut mot slutten av dette oppgjeret.

- Eg fekk ein smell, og tok ingen sjansar på å fortsette då det var minus 15 grader. Eg måtte jo tenkje litt på at eg skulle direkte på nytt prøvespel den komande veka også, seier forsvarsklippa frå Vadheim.

Hønefoss neste

Allereie søndag kveld var Vegar Gjermundstad på plass i den nyopprykka Tippeligaklubben Hønefoss, og var klar for trening med nye spelarar.

- Eg kjenner litt til nokre få spelarar som eg var saman med i Lyn. Elles er det mest ukjende, seier Gjermundstad og kjenner sjølvsagt til at tidlegare Sogndal-profil Rune Bolseth spelar på HBK.

- Ja, eg veit at Bolseth er her. Eg har sjølvsagt høyrt mykje om han, men kjenner han ikkje. Og det skal bli moro å snakke med han, seier Gjermundstad.

I tillegg til treningar med Hønefoss, skal også Gjermundstad spele treningskamp mot Stabæk på tysdag.

- Eg kjenner veldig lite til klubben. Når det gjeld midtstopparar så veit eg at Frode Lafton og Sigurd Örn Sigurdsson spelte stopparar i fjor då Hønefoss vann Adeccoligaen. Så vi får sjå kva som skjer. Eg er open for det meste, og må ta dei sjansane som dukkar opp, seier Gjermundstad.

Gjermundstad trente med Sogndal ut januar månad, og har så langt ikkje fått tilbod om kontrakt i den klubben.