Vegar Gjermundstad (20) kan miste debuten for Sogndal mot Strømmen komande søndag, etter at konkursbuet i Lyn krev betaling frå Sogndal. Det skriv Sogn Avis.

150.000
Gjermundstad vart oppsagt av den konkursråka klubben i mai, og vart presentert som ny Sogndal-spelar tidlegare denne månaden. Dermed skulle alle band til gamleklubben vere sletta.

Men det viser seg no at bubestyraren i Lyn krev utdanningskompensasjon for klubben sine spelarar. I Gjermundstad sitt tilfelle dreiar det seg om 150.000 kroner.

Dette ønskjer ikkje Sogndal å betale.

- Heimekampen mot Strømmen kan gå i vasken. For at Vegar skal vere speleklar må alle detaljar rundt overgangen vere avklart, noko dei ikkje er per no, seier sportsleg leiar i Sogndal Fotball, Trond Fylling til Sogn Avis.

Kompensasjon
Norges Fotballforbund prøver saman med konkursbuet å komme fram til ei løysing.

- Vegar vart oppsagt frå klubben då han etter fleire lønskutt nekta å skrive under på ny kontrakt. Dette skjedde før Lyn gjekk konkurs, og det står klart i NFF sine reglar at sidan han vart oppsagt har dei ikkje rett på noko form for kompensasjon, seier Fylling.

Han tykkjer det vil vere ulogisk om dei kan fristille spelaren for å spare utgifter, for så å kreve kompensasjon i ettertid.

Løysing
Leiaren ved juridisk seksjon i NFF, Eirik Sandsten, fortel at ei løysing på problemet skal komme denne veka.

- Saken har mange sider og partar, og vi skal bruke tida fram til 1. august for å finne ut av korleis vi skal løyse den, seier Sandsten til TV2.