Etter at Høyang tapte mot Sandane i Firdaligaen i helga, sende trenar Terje Fjæren ei tekstmelding til alle spelarane der han gir dei det glatte lag.

Firda har fått tilgang til SMS-en, der Fjæren skriv følgjande:

"La eg presisere at detta e en fellesmelding og at noen må ha meg unnskyldt. D vi prestera i dag e bånn i bøtta, ke fan e d vi drive m? Detta e så elendigt at eg finne fan ikkje ord. Eg e jævligt skuffa over prestasjonane våre. Så får dere kalle meg for ka fan der vil. Elendigt."

Frustrert over mange kort
Høyang-trenaren innrømmer at han gjekk for langt, men forklarer at han var veldig frustrert etter 0-2-tapet mot Sandane.

Han har beklaga meldinga og ville gjere det igjen på spelarmøte måndag kveld.

- Grunnen til at eg sende ho, var at eg var så frustrert av dei tre gule korta vi fekk på slutten av kampen. Det er så frustrerande at vi aldri kan stille med same lag to kampar på rad, grunna gule og raude kort, seier Fjæren.

- Må vurdere stillinga hans
Administrativ leiar Teddy Moen i Norsk Fotballtrenerforening meiner fotballstyret i Høyang må vurdere om Terje Fjæren kan halde fram som trenar etter SMS-utskjellinga.

- Uff, nei, det var ikkje ei heldig melding. SMS-ar må for all del ikkje nyttast på denne måten, seier Moen.

Han synest saka er spesielt lei sidan det er mange unge spelarar i stallen til Høyang.