Denne bodskapen har i løpet av eit døgn fått rundt 200 personar til å teikne seg på Facebook-gruppa «Ny tribune på Fosshaugane».

Sogndal Fotball har av økonomiske årsaker lagt planane om ei fjerde og siste tribune på Fosshaugane Campus på is.

Tribunen langs den eine langsida, på folkemunne kalla «Bjørkesida», er den einaste attverande ståtribunen i tre, etter den storstilte utbygginga av stadionet for eit par år sidan. Etter planen skulle Sogndal Fotball bruke millionar på å byggje tribune langs veggen på nye Sogndal vidaregåande skule. No er skulen under oppføring – men utan tribune.

Det har fått Vidar Vadseth, mangeårig profilert leiar i supporterklubben Saftkokarane, til å ta saka i eigne hender. Søndag kveld oppretta han ei eiga Facebook-gruppe med oppmoding om å gi pengar til fullføring av tribunen.

«Du som skriv deg på her seier deg då viljug til å donera ein 200-lapp til dette formålet. Inviter med deg vener og kjente, so slepp me at det ser so halvferdig ut på «Haugadn». », skriv Vadseth.

Klokka 21 måndag kveld hadde 191 personar teikna seg på oppropet. Med lovnader om 38.200 kroner, står det dermed berre att nokre millionar...