Gjekk laus på politibil og politibil-leikehytte
Ein eller fleire ukjende personar brende natt til søndag ned ei politibil-liknande leikehytte i ein barnehage i Vik, og gjorde samstundes hærverk på ein ekte politibil som stod parkert i Vik sentrum.
I tillegg er det knust ruter og dører i bygningen til Vik Industri. Denne ligg i det same området.
Politiet ser klar samanheng mellom skadeverka, som truleg har skjedd mellom klokka 03 og 04 om natta.
- Det verkar som nokon har hatt aggresjon i deg, og det kan sjå ut som den til dels kan ha vore retta mot vår etat, seier operasjonsleiaren ved Sogn og Fjordane politidistrikt.
Politiet skal seinare avhøyre vitne i saka, og har god tru på oppklaring, ikkje minst sidan Vik er eit oversiktleg og vanlegvis svært roleg lokalsamfunn.
Leikehytta som var forma som ein politibil skal ha blitt heilt øydelagd av brannen. På politibilen som vart nytta av vakthavande polititenestemann er det rive av eit skilt, og ein vindusviskar er bøygd. Hos Vik Industri er det ifølgje politiet knust nokre glas og dører, og ein bil som tilhøyrer verksemda har fått øydelagt baklys og vindusviskarar.
|
|
Utskriften er kun til privat bruk og kan ikke benyttes på annen måte.
Kopiering eller spredning av innholdet krever avtale med rettighetshaver eller Kopinor.
