2000 russ og andre ungdommar er målgruppa.

Rådmann Ole John Østenstad vender tommelen ned. Han meiner Utstillingshallen ikkje er trygg nok og at russefeiringa ikkje bør kommersialiserast.

– Det vil vere direkte bittert om dette går i vasken. Og det vil vere veldig trist for foreldra, etter som vi prøver å få til eit rusfritt arrangement. Men vi har ikkje gitt opp håpet. Vi kjem til å klage på rådmannens avgjerd, seier Simon Vie som er ein av fire initiativtakarar.

– Vi er ikkje fornøgde med tryggleiken rundt Utstillingshallen, seier rådmann Ole John Østenstad, som svar på kvifor han set foten ned for ungdomsfesten på Festplassen.

– Vi er klar over stoda som er i bygget, legg han til.

Rådmannen seier også at han er svært skeptisk til at det blir eit samlingspunkt med så mykje folk på èin plass i Førde sentrum.

– Vi har stilt spørsmål om det er lurt å gjere dette, fordi vi er redde for meir bråk og uro, seier han.

Østenstad synest russen tidlegare har organisert feiringa greitt på eiga hand.

– No er det snakk om inngjering og kommersialisering. Russen bør få bruke Tangen utan at det blir kommersialisert, meiner rådmannen.

– Vie seier at han hadde fått positive signal både frå Øberg og politiet. Har du hatt kontakt med dei i forhold til saka?

– Eg og Øberg har diskutert saka, og vi er einige, seier Østenstad.

Rådmannen snakka med Simon Vie i går, og sa frå om at han står fritt til å klage til formannskapet, slik at dei kan sjå på saka uavhengig av kommuneadministrasjonen.

Ei eventuell klage blir handsama i formannskapet allereie torsdag.