Styret i Helse Førde var fredag føremiddag samla til styremøte ved Førde sentralsjukehus. Styreleiar Clara Øberg var då klar på ho ikkje ynskja å gå inn på nokon debatt om kommunelegane i Nordfjord sin handlemåte, i samband med dei nyleg avslørte feiltilvisingane til Volda sjukehus.

• Bakgrunn: Sender pasientar til avdeling som ikkje finst

• Pasientombodet reagerer: Refsar Nordfjord-legar etter tilvisingsrot

- Vi i Helse Førde skal konsentrere oss om å ha gode faglege tilbod ved våre tre sjukehus, slik at pasientane vel oss fordi dei får god behandling, slår Øberg fast.

Ho kunne leggje fram tal som syner at 80 prosent av pasientane i Sogn og Fjordane i dag vert behandla i eige helseføretak, altså anten i Førde, Lærdal eller på Nordfjordeid. Noko som også inneber at akkurat 20 % vel å reise ut av fylket for behandling.

- 16-17 prosent av dei pasientane som reiser ut av fylket skal gjere det uansett, fordi det er faglege grunnar til det, seier Øberg. Dette er noko som vert praktisert i alle helseføretak, og gjer at ein står att med 3-4 prosent som aktivt ynskjer behandling ein annan stad enn ved eit av dei tre sjukehusa i Sogn og Fjordane.

- Eg reknar med at dei utslaga som no måtte vere i pasientstraumane etter kvart vil normalisere seg, når folk si merksemd meir rettar seg mot kvar tilboda finst og kvar ein får best behandling med kortast ventetid, seier Øberg.