Kommunane Solund, Ullensvang, Jondal, Vaksdal og Risør protesterer kraftig mot freding av fire svingete vegstrekningar som vert omfatta av den nasjonale verneplanen for vegar, bruer og andre kulturminne med tilknyting til vegane.

Protestane er komne etter at Riksantikvaren tidlegare i år varsla freding av til saman 66 vegar i Statens vegvesen sin verneplan.

I Solund er det snakk om freding av riksveg 606 mellom Krakhella og Hardbakke. Vegstrekninga vert hevda å ha nasjonal verneverdi fordi den er «tidstypisk for 1950- og 1960-talet, og viser samferdslehistorie som tilknytingsveg med viktig overgang frå sjø- til landferdsle og er eit eksempel på vegutløysing i kyststrøk.»

- Det er eit fellestrekk at samtlege av desse kommunane fryktar at ei freding av vegen vil leggje begrensningar på utviklinga av lokalsamfunna, skriv Statens vegvesen.

Dei sterke innvendingane frå dei fem kommunane fører til at forslaga om fredning skal drøftast på nytt med kommunane, får NTB opplyst i Statens vegvesen.