Måløy blir senter for havmølleparkar
Sikkerhetssenteret i Måløy underteikna tysdag ein avtale for å utvikle senteret til eit nasjonalt senter for utvikling og utdanning innan installasjon, drift og vedlikehald av havmølleparkar.
– Det er svært gledeleg å sjå at satsinga Sogn og Fjordane fylkeskommune har gjort på å byggje opp eit førsteklasses simulatormiljø ved Sikkerhetssenteret i Måløy no får gjennomslag nasjonalt, seier fylkesordførar Nils R. Sandal.
Fylkesordføraren peikar også på at Sikkerhetssenteret er ein del av eit større teknologimiljø i Måløy retta inn mot offshore vind.
Sikkerhetssenteret i Måløy har ein av Norge sine mest avanserte 360-graders skipssimulatorar, og har utvikla realistiske simuleringsmiljø for fullskala vindparkar til havs. Her er det mogleg å teste ut alle typar marine operasjonar knytt til offshore vindkraft.
Intensjonsavtalen vart signert i Måløy i samband med Vindkraftforum 2010, arrangert av Vindkraftforum Sogn og Fjordane. Det var senterdirektør John Olav Tande ved Nowitech og fylkesordførar Nils R. Sandal som underteikna intensjonsavtalen.
Nowitech (Norwegian Research Centre for Offshore Wind Technology) er eit av dei nasjonale forskingssentra for miljøvennleg energi som vart oppretta av Regjeringa i 2009.
|
|
Utskriften er kun til privat bruk og kan ikke benyttes på annen måte.
Kopiering eller spredning av innholdet krever avtale med rettighetshaver eller Kopinor.
