Gustav Johan Nydal (49) frå Florø er tilsett som ny administrerande direktør for det kanadiske skipsverftet Davie Yards Inc.

Nydal tek over for Steinar S. Kulen, som går over i rolla som styreformann i selskapet. Dei to tek til i sine nye roller 15 februar i år.

Skipsverftet Davie ligg i byen Lévis i Quebec i Canada, og har rundt 1800 tilsette. Verftet har for tida fem skip under bygging, og har dei siste to åra vore leia av Steinar Kulen.

- Eg føler det er rett tidspunkt å overlate den daglege leiinga til nokon andre, og eg er glad for at Nydal blir med på laget. Davie treng ein administrerande direktør som kan jobbe ved verftet i Lévis på fulltid. Det er ikkje mogleg for meg å kombinere med familiesituasjonen min, seier Kulen i ei pressemelding.

Han og Nydal har tidlegare samarbeid i verftsindustrien i Norge, og begge har vore direktør for verftet i Florø. Nydal var administrerande direktør for Kleven Florø frå 2001 fram til Aker Yards kjøpte verftet i 2006. Steinar S. Kulen tok då over som administrerande direktør for Aker Yards Florø, og var i denne stillinga fram til sommaren 2007.