Eit topplag av næringslivsaktørar går no sammen om å greie ut moglegheita for å etablere eit av verdas største, sikraste og mest miljøvenlege datasenter i Lefdal gruve i Måløy.

Hafslund ASA, IBM, North Cape Minerals, DNB Nor, Sogn og Fjordane Energi (SFE) og Tandberg deltar alle i forprosjektet økonomisk og/eller med fagekspertise og teknologi.

Største i Norge nokonsinne
Lefdal Gruve vil kunne bli den største norske satsinga på datalagring nokonsinne.

Styringsgruppa for Prosjekt Lefdal gruve vert leia av Ingvild Myhre, tidlegare administrerande direktør i Network Norway og Telenor Mobil og no blant anna leiar av Teknologirådet.

Styringsgruppa består i tillegg av konsernsjef Christian Berg i Hafslund ASA, administrerande direktør Morten Thorkildsen i IBM Norge, konsernsjef Ole Schancke Eikum i Sogn og Fjordane Energi ASA (SFE) og administrerande direktør Birger Nilsen i North Cape Minerals AS (NCM).

IT-bedriften LocalHost i Måløy, som har utvikla ny kjøleteknologi for datalagring, er initiativtakar til prosjektet og vil stå for prosjektleiinga.

Ferdig sommaren 2010
- IT-bransjen er midt i eit paradigmeskifte med virtualiseringsteknologi som gjer det mogleg med store, nye etableringar av datasenter der det ligg mest naturleg til rette. Datasenter kan bli ein ny, norsk kraftkrevande industri der vi skapar verdiar av våre unike, reine og rimelege energiressursar. Lefdal gruve-prosjektet vil ta oss eitt skritt vidare når det gjeld kva som skal til for at den døra vert opna også internasjonalt, seier Ingvild Myhre i ei pressemelding.

Lefdal gruve er verda største, underjordiske olivingruve og ligg mellom Måløy og Nordfjordeid.

Forprosjektet som no vert sett i gang skal sjå på alle forhold ved mogleg bruk av gruva til storskala datalagring, med særleg vekt på sikkerheit, teknologi og marknad. Styringsgruppa møtest i Måløy i januar. Forprosjektet skal vere ferdigstilt sommaren 2010.

Prosjektet Lefdal gruve vert støtta økonomisk av Fornyings- og administrasjonsdepartementet (FAD) og Innovasjon Norge.