Fiskeprodusenten i Bulandet i Askvoll krev 8,4 millionar kroner i erstatning på grunn av seismikkskyting i perioden 2006-2008. Bakgrunnen er tap av seifangst.

Dette er truleg det største erstatningskravet av denne typen som nokon gong er fremja i Norge, skriv FiskerbladetFiskaren på nett.

Fisken er borte

Geir Ove Ystmark i Fiskeri- og havbruksnæringens landsforening seier til avisa at han meiner Bulandet Fiskeindustri har fremja eit godt dokumentert krav.

I treårsperioden 2006-2008 fekk bulendingane tilgang til over 4.000 tonn mindre sei enn perioden 2003-2005. Årsaka er seismikkskytinga på fiskefelta i sør, hevdar verksemda.

– Det er blitt færre fiskebåtar, men dei har større kvotar dei som er att. Og havforskarane seier at det skal vere mykje sei i sjøen, men fiskarane finn ikkje seien, seier Per Arild Tysse ved Bulandet Fiskeindustri, til FiskarbladetFiskaren.

Sprengte vest av Bulandet

Han trur at nedgangen starta alt i 1985. Garnbåtar som tidlegare fiska på Vikingbanken har sidan den gong ikkje funne sei i gytetida

– Dette er data som Fiskeridirektoratet sit på og som burde vore analysert og vurdert opp mot oljeaktiviteten, meiner Tysse.

Han stiller seg tvilande til om petroleumsindustrien rapporterer verksemda si på ein korrekt måte.

– Vi har henta inn data over seismisk aktivitet i perioden 1979-2008. Aktiviteten har vore høg, men det er ikkje mogleg å sjå når og kvar i løpet av året aktiviteten har føregått. Til dømes viser kartet over 2008 viser det ingen aktivitet vest av Bulandet. Då seifisket skulle starte i vår, fekk vi tilbakemelding frå fiskarane at det var ingen fisk å sjå og at det ikkje var så rart då det låg seismiske fartøy på feltet og sprengde, seier Tysse.