Norges vassdrags- og energidirektorat (NVE) meiner det er for dyrt for vasskraftverka å gjere utbetringar med dagens straumprisar. Dette trass i at kraftverka går med milliardoverskot.

Undersøkingar frå NVE viser at norske vasskraftverk har mykje å hente på å fornye teknologien. Utbetringane vil ikkje ha negative miljømessige konsekvensar, og kan auke produksjonen til vasskraftverka med rundt 10 TWh i året. Det tilsvarer det årlege straumforbruket til rundt 500.000 norske husstandar. Men med dagens straumprisar vil investeringane i liten grad vere lønsame, meiner NVE.

Må stoppe

– Mange kraftverk må stoppe i lengre periodar for å få gjort tiltak som gir fortringar. Dette gir inntektstap som kan vere en større utgiftspost enn sjølve tiltaket. Dermed blir det ulønsamt å gjere noko om vi legg dagens marknadspris på straum til grunn, seier Torodd Jensen, seksjonssjef i NVE.

Men sjølv med høgare straumprisar og betre støtteordningar, vil det ifølgje NVE vere urealistisk å tru at ein får utnytta det tekniske potensialet fullt ut.

– Men burde ikkje vasskraftverka, som går med milliardoverskot, ha råd til å gjere desse investeringane utan støtteordningar?

– Sidan selskapa er bedne om å vere kommersielle, vil dei ikkje investere i ulønsame prosjekt. Men det finnest også andre barrierar. Det kan vere at ein del lønsame prosjekt blir sett til side fordi ein ikkje har ingeniørar nok til å jobbe med dei, seier Jensen.

Ny støtteordning

Guri Størvold, statssekretær i Olje- og energidepartementet, trur kraftverka sjølve vil ta ansvar og forbetre anlegga.

– Kraftprisane vil gå opp. Då vil det også bli meir interessant å gjere utbetringar. Eg trur kraftselskapa er opptekne av å ta samfunnsansvar og vil vere med på en klimadugnad, seier Størvold.

Ane T. Brunvoll, som jobbar med fornybar energi i Bellona, er overraska over at NVE ikkje meiner det er meir lønsamt å ruste opp vasskraftverka.

– Eg er skuffa viss det stemmer at det berre vil vere lønsamt å oppgradere vasskraftverka slik at dei produserer 1 TWh meir enn i dag. Men berre 1 TWh er forferdeleg mykje energi, så vi får håpe at vassverka i alle fall får utnytta dette. (ANB)