Det seier informasjonssjef i Posten, Eivind Rossen.

-Etter å ha følgt oppslaga i Firda om postlevering til øyane verkar det på meg som tidspunkt for levering av aviser er det viktigaste for dei som bur på øyane. Derfor ser vi no på om vi kan levere som før. Det betyr ferske aviser, men gammal A-post, seier Rossen.

Kvalitet

-Vårt mål er å levere best mogeleg kvalitet. Vi har ikkje noko mål om å gjere livet vanskeleg for folk i Sogn og Fjordane, tvert om, seier Rossen.

Han seier dei nye postrutinane på øyane kom for å levere betre kvalitet.

-Dei nye rutinane fører til at øyane får A-posten 20 timar tidlegare enn med den gamle ordninga. Avisene som vert sende med posten kjem då om ettermiddagen, seier Rossen.

Omlegginga har gått greitt

Når det gjeld den store omlegginga i postsorteringa i Sogn og Fjordane sist veke er Posten svært godt nøgd med den.

-Det har gått veldig greitt. Ting har fungert. Litt problem har det vore på grunn av stengde flyplassar som følgje av snø og tåke. Men det har ikkje noko med omlegginga å gjere, seier Rossen.

Han understrekar at målsetjinga er å få best mogeleg kvalitet på postleveringa, med den logistikken som finst.

-Vi jobbar heile tida med å sikre leveringane slik det er avtalt. Skal vi klare dette er det viktig at stafetten går uavbrote, og det synst vi at vi har fått godt til med den nye omlegginga, seier Rossen.