– Det er absolutt grunn til bekymring over omfattande bruk av medisin mot lakselus, seier fagdirektør for veterinærmedisin i Statens Legemiddelverk (SLV), Tonje Høy, til Firda.

Høy er kjend med at SFT (no klima- og forureiningsdirektoratet) i sine rapportar åtvarar mot bruk av middela som SLV no innvilgar godkjenning for.

– Dette tok vi også med i preparatomtalane.

Desperat

Høy kallar dagens situasjon med lakselus desperat, og difor blir søknadene frå veterinærane om bruk at kitinhemmarar godkjende. Men det er eit mål at ein skal bruke minst muleg, seier Tonje Høy til Firda.

– Dersom veterinærane seier at dei har behov for så og så mykje, har vi godkjent desse mengdene.

– Firda har snakka med veterinærar i området som hevdar at dei «skriv søknad med gaffel og gongar med ti». Grunngjevinga er at dei skal sleppe å skrive nye søknader dersom dei treng meir lusemiddel. Er dette ein praksiss som SLV tykkjer er god?

– Nei, veterinærane bør ikkje søkje om meir enn dei har behov for.

Nødsituasjon

Tonje Høy legg til at dette er ein nødsituasjon, og at det er heva over tvil at krepsdyr som er i nærleiken av oppdrettsanlegg vil bli påverka. Dette gjeld dyr som er i skalskiftealder.

Men SLV må ifølgje Høy ha ein dokumentasjon på skadelege miljøeffektar dersom dei skal bruke dette som kriterium for å nekte søknader.

- Det er vanskeleg å bruke føre-var-prinsippet på legemiddel som allereie har fått innvilga marknadsføringsløyve. Vi skal no revurdere desse preparata i forhold til miljøet, seier fagdirektøren.