Tal frå forsikringsselskapet Gjensidige, som fekk erstatningskrav frå 18 griseprodusentar etter utbrotet av svineinfluensa, viser at desse får til saman 1 million kroner i erstatning for driftstap.

- Det er mykje mindre enn frykta. Vi frykta at dette ville bli stort, seier produktsjef Torfinn Jæger i Gjensidige til Nationen.

Når det gjeld erstatning ved naudslakt, ramma dette berre grisebonden Åge Grenne i Åsen i Nord-Trøndelag. Han eig garden der det først vart oppdaga svineinfluensa hos gris, og 400 dyr vart slakta.

Staten verdset ein slakteferdig gris til 1.100 kroner, medan slakteriets pris er 1.700 kroner. Det betyr at Grenne tapte 65.000 kroner samanlikna med kva han ville fått om han hadde selt dyra til slakteriet.

No krev Norges Bondelag at Landbruks- og matdepartementet aukar erstatningane, fordi satsane ikkje er blitt justert sidan 2003.