Arnfinn Solheim i Svelgen fekk ein hummar på heile 5,3 kilo i ei torskeruse i Vevlingen i Flora. No får hummaren eit nytt liv, som prydgjenstand.

Preparant Monicha Landøy i Florø fekk hand om hummaren og fortel at det er fint mogleg å stoppe ut dyr som hummar og krabbe.

– Mange har sagt til meg at dersom dei hadde visst det, ville dei ikkje ete hummaren, men heller fått den stoppa ut. Det er jo litt trist å komme på i ettertid, seier Landøy, som forsikrar at resultatet blir svært bra, og at dei som vil, også kan få tilbake kjøtet i halen og klørne.

– Men såpass store humrar som denne kjempa her, er gjerne grove i kjøtet og ikkje så gode å ete, seier Landøy.

– Å stoppe ut hummaren, er ein omfattande prosess, men resultatet blir bra og det er heller inga vond lukt, seier Landøy, som forsikrar at kjempehummaren frå Vevlingen snart vil vere god som ny. I alle fall utanpå.