Synne og Einar Alsaker hadde sett seg eit mål om å trekkje store artistar til Hønsehagen Vinkjellar. Tanken var å få til dette i løpet av fem til ti år.

Under to år tok det før Jon Eikemo inntok Stongfjorden. Dette opna dører for ekteparet, som blant anna har hatt besøk av Ole Paus og Thom Hell og i desember kjem Vamp til bygda.

– Det er ikkje til å tru. Dette er jo ikkje akkurat verdas navle, seier ei godt nøgd Synne Alsaker.

Heilt unikt

Og i helga var det altså Larkin Poe, som mellom anna har spelt med Elvis Costello, som vitja den vesle bygda.

– Det er fantastisk her, og heilt unikt, seier Rebecca Lovell. Søstera, Megan, er heilt einig. Duoen har vore i Norge åtte gonger, og tykkjer det er veldig kjekt at folk her i landet set pris på musikken deira.

Fredag heldt dei ein intimkonsert for 36 heldige i ein fullsett vinkjellar, og laurdag stod dei på scena under ein utekonsert i regi av Dalsfjordveka.

Spela inn musikkvideo

– Det er klart vi har vore heldige, seier Synne. Det stilige lokalet, der alt er i gjennomført mellomalderstil, har blitt ein «snakkis» i musikkmiljøet.

For eitt år sidan tok manageren Larkin Poe har i Norge, kontakt med Alsaker. Han ønskte at bandet skulle få halde ein konsert, samt lage ein musikk-DVD, i Hønsehagen vinkjellar.

Medan bandet vitja Stongfjorden, fekk crewet ein idé om også å lage musikkvideo til songen «Play On». Videoen vart sleppt i vinter, og har over 77.000 treff på YouTube.

Personleg

Søstrene i Larkin Poe voks opp i Calhoun i Georgia, ein stad med kring 15.000 innbyggjarar. Dei har det heilt topp i Stongfjorden, og har nytta dagane «på landet» til å hente seg inn att.

– Helikopterturen over isbreen var ei utruleg oppleving. Vi kjenner oss bortskjemte, og har hatt det utruleg flott her, seier Rebecca.

Konserten i vinkjellaren opnar for ein heilt anna kommunikasjon med publikum enn dei er vande med.

– Det vert meir intimt, vi får personleg kontakt med publikum, seier Rebecca.