Dei førebelse tala viser at 11 500 har besøkt countryfestivalen på Breim. Det er 1000 fleire enn i fjor.

– Vi er strålande fornøgde, særleg med tanke på vêret. At vi med regnbyer har klart å få ei auke i besøkstal tykkjer eg er fantastisk, seier dagleg leiar Eva Hage Solstad.

Har du bilete frå festivalen? Send dei gjerne til redaksjon@firda.no eller fitips til 2005

På scena har mellom andre Vassendgutane, Green Granadas, Hellbillies, Bobby Bare og Vince Gill. Regnet heldt seg unna under konsertane.

– Det er ikkje til å komme ifrå at vi er avhengige av snille vêrgudar. Her var det opplett under konsertane på hovudscena alle tre kveldane. Publikum fekk nyte musikken sitjande, ståande og dansande, seier Solstad.

Fullt hus i kyrkja
Kyrkjekonserten i Breim kyrkje lokka til fullt hus. Solstad reknar med at rundt 700 var på plass.

– Kyrkja er vel sjeldan så full trur eg, seier Solstad.

Artistansvarleg Nils R. Sandal synest kyrkjekonserten var ei sterk oppleving. Høgdepunktet under festivalen var Vince Gill sin konsert på hovudscena.

– Det var ein enorm konsert med mykje folk. Det var heilt utruleg, seier han.

Straumproblem
Solstad fortel om gode tilbakemeldingar frå gjestene. Både musikken og fasilitetane har fått skryt.

– Folk opplever det som ryddig og reint i sanitæranlegga. Det er noko vi legg vekt på.

På grunn av det kjølige vêret fekk festivalen straumproblem. Vêret gjorde at mange trong varme i fortelta. Dette vil Solstad jobbe med å utbetre til neste år.

– Når folk er så ivrige etter å komme sjølv om ruskever, så må vi har kapasitet til å varme opp fortelta, seier ho.

Rekorden var i 09
Publikumsrekorden på 13 100 var i 2009.

– Den skal vi byggje oss opp att til og klare i godvêr, seier Solstad.

På campingen har det vore i underkant av 1800 gjester totalt. Det er noko færre enn i fjor, som og var ein tørrare år.

– Campinggjestene toler alt slags vêr, medan gjester med dagsbillett er meir vêravhengige, seier Solstad.