For første gong nokosinne stiller den kjende kunstnaren Håkon Bleken ut måleria sine i Sogn og Fjordane, nærare bestemt i Eikaasgalleriet på Ålhus i Jølster.

- I dag har Jølster besøk av ein stor kunstnar, sa ein glad Kristian Fossheim då han opna utstillinga på Eikaasgalleriet laurdag.

Fysikkprofessoren Fossheim er heimehøyrande i Jølster, men er til liks med Bleken Trondheims-basert i det daglege. Det er han som har henta Bleken til fylket, i samarbeid med Sogn og Fjordane Kunstmuseum og direktøren der, Morten Johan Svendsen.

56 av Blekens nye arbeid, 15 store oljemåleri og 41 litografiar vert å sjå på Ålhus frå no og fram til 18. desember.

Mellom verka publikum kan beundre i museumsbygget like ved Jølstravatnet er verdifulle «Etter Dramaet», verdsett til nøyaktig ein halv million kroner. Også eit av Blekens mest kjende oljemåleri «Naken og pansret», er kome til Jølster og utstillinga, som forøvrig går som ei salsutstilling.

Det vil seie at kven som helst kan kjøpe flesteparten av dei ulike verka som heng utstilt - om lommeboka strekk til, riktignok.