Med namn som Kari Bremnes, Sigvard Dagsland og Thom Hell, fekk Balejazz besøk av folk frå Bergen, Voss, Oslo, Tromsø og sjølvsagt også sogningar og fjordingar.

Ekstra kykjekonsert

– Vi hadde besøkjande som sa dei allereie no hadde bestemt seg for å komme tilbake til neste Balejazz, og det er eit teikn på at vi har lykkast, seier leiar i Stiftinga Balejazz og hotellsjef ved Kvikne`s hotell Sigurd Kvikne etter helgas arrangement.

Han fortel at dei måtte sette opp ekstrakonsert i Den engelske kyrkja for å møte etterspørselen. Det var Trio Mediæval som hadde kyrkjekonserten. Trioen vart etablert i 1997, og har hausta gode kritikkar frå verda over.

– Vi har ikkje den fulle oversikta over kor mange som besøkte Balejazz sine konsertar og arrangement, men reknar med det ligg på rundt 3500, seier Kvikne. I dag skal dei telle over dei selde billettane.

I fjor hadde festivalen kring 3300 besøkjande.

Dette er Balejazz

Stiftinga Balejazz er etablert av Balejazz, Kvikne`s Hotel AS, Balestrand kommune, Vestnorsk Jazz-senter og Sogn og Fjordane fylkeskommune.

Føremålet til stiftinga er å arrangere den årlege jazzfestivalen, å vere med på å utvikle musikarar og miljø som jobbar med jazzmusikk, og prøve å auke interessa kring sjangeren.