Til helga er det klart for den tredje internasjonale rundballefestivalen i Fjærland, og ein av programpostane under festivalen er Rundballerock.

Dette er ein stafettkonsert som går av stabelen fredag på ferjekaien i Fjærland.

Krava til banda som melder seg på, er at minst ein av songane på ein eller annan måte må kunne knytast til rundball.

Arrangøren av festivalen trekkjer fram aktuelle døme på songar, som Great Balls of Fire, Green, Green Grass of Home og Det går rundt og rundt.

Samstundes presiserer dei at ein eigenkomponert låt er det aller beste.

- Vi har den mest originale rockekonserten på den tøffaste festivalen i landet, og her set berre fantasien grensene, seier Eivind Ødegård i rundballenemndi.

Rundballerocken er open for både små og store band, unge og gamle deltakarar, og det vert pengepremie til kveldens beste band.