Koret Jomentum sin musikal «Kjærleik og musikk i paviljongen», om livet rundt den gamle musikkpaviljongen ved Likkjevatnet, gav nostalgikarane ei feststund på Flora samfunnshus. Men nostalgien blei i lengste laget.

Gamle slagerar frå tretti-, førti- og femtiåra var ramma rundt kjærleikssoga om Malene (Kristin Orre), og Per, (Bård Melvær), sett saman til eit spel om Florø og byen si ikkje altfor fjerne fortid.

Det let tidvis svært bra, akkompagnert av eit framifrå orkester, men i lengda vart det likevel i overkant langdrygt og sukkersøtt, med ei overdose av ulukkeleg kjærleik, gamle slagerar, barnekor og leikar.

Mange framifrå prestasjonar, som til dømes Kristin Orre sin innsats som Malene, som ungjente, åleinemor og gammal kvinne, tidsriktige kostyme, ei artig lokalhistorisk vinkling på forteljinga og store mengder songglede og scenesjarm sytte for at dei frammøte lokalnostalgikarane fekk ei feststund.

Men framsyninga hadde heilt sikkert tent på ein strammare regi og meir økonomisk tidsbruk. Godt over to timars speletid, pause ikkje inkludert, vart i meste laget, også for florøpatriotiske nostalgikarar med sans for byhistorikk og gamle slagerar.