Ei av bøkene på haustlista til forlaget Skald er ei fotobok om kunstnaren Kjartan Slettemark, som døydde i fjor.

Boka har fått tittelen "Kjartan Slettemark - kunsten å falle", og kunstnaren var sjølv med på å planlegge fotoboka.

To ønskje
Bileta i boka er tekne av Slettemarks gode ven, fotografen Brita Olsson. Ho følgjer naustedølen frå han gjorde svenske av seg på seksti-talet og fram til 2008.

– Kjartan hadde to ønskje for boka: Ho skulle ha blinkande lys i ryggen, og ho skulle eksplodere om ho ikkje vart opna på tre veker. Desse ønskja har vi ikkje klart å innfri, men elles trur eg vi har laga ei bok i hans ånd, seier forleggjar Lars Nes.

Barn og song
Bokhausten hos Skald forlag inneheld også "Eventyrboka", som er ein oppfølgjar til "Godnattboka - nynorske forteljingar". Den andre barneboka på haustlista er "Torbjørn Isbjørn".

For songfuglane kjem boka "Syng meg heim", der Olav Stedje vert heidra i ei bok med 50 songar. I tillegg kjem "Julesongar", det første nynorske julesongheftet på mange år.

Reise og historie
"Costa Blanca - 53 opplevelser" kjem også i haust. Boka er oppfølgjaren til "Gran Canaria - 53 opplevelser".

Haustlista til Skald inneheld også "Levd liv", ei bok som fortel historia til sogningane.

Bokhausten hos Skald byr også på "Langs veglause strender", som handlar om eit område langs sørsida av Sognefjorden i kommunane Vik og Høyanger.