– Økonomisk sett hadde vi alt tidleg i veka dekkja opp 80 prosent av budsjettet, fortel Bjørn Engelbrektson i Engelbrektson AS.

Han står som arrangør for helgas dansegalla der spelemannsprisvinnar Anne Nørdsti er det store trekkplasteret på Rica Sunnfjord Hotel.

Ventar 700

– Vi la ut hotellpakkar med billett inkludert. No er hotellet fullbooka, seier Engelbrektson nøgd.

Dansegallaen var i mange år fast på programmet i Førdehuset, men etter sviktande publikumstal vart arrangementet i fjor flytta til Sunnfjord Hotel.

– Det verkar som om marknaden har teke seg opp att. Så langt har vi selt mellom 100 og 150 billettar. Vi har kapasitet til 1100 publikummarar, men ventar 600-700. Då er det eit vellykka arrangement, seier arrangøren.

Steinar gler seg

Han fortel om mange telefonar frå danselystne.

– Det er både lokale og langvegsfarande. Vi har ein del faste som reiser på slike arrangement.

Engelbrektson trur dei fleste kjem for å høyre Anne Nørdsti, men reknar også broren Steinar og hans danseband som eit godt trekkplaster.

Steinar Engelbrektson sjølv, gler seg i alle fall.

– Det brukar å vere veldig bra i Førde. Med så varierte band og god innsats trur eg det blir ein flott dansegalla. Eg reknar meg som trekkplaster, men Spellemannprisen til Nørdsti vil nok dra mange, seier fylkets mest profilerte dansebandartist, Steinar Engelbrektson.