Kårstad kunne i Firda måndag lese kritikk frå Eigil Hjelmeland som etter helgas Gaularspel kritiserte familiearrangementet for å ha blitt for valdeleg med innslag av sverdkamp og «blodige» skodespelarar.

– Ser meir vald på tv

– Eg forstår kritikken og tykkjer det er fint at det blir reist ein debatt. Likevel trur eg ikkje det ein får servert på Gaularspelet er så gale. Dei unge er som regel i følgje med foreldra, og det dei får servert på tv heime er langt verre, meiner styreleiaren.

Han påpeikar dessutan at tilbakemeldingane elles så langt berre har vore positive etter det som vart eit jubileum i Osen.

Då skodespelarane entra spelstaden på premieren laurdag var det 20 år sidan det historiske spelet om Gaular-jarlen Atle første gong vart vist – den gong i form av nettopp Egil Hjelmeland si historie.

170.000 i billettar

Og framleis sviktar ikkje publikum Gaularspelet og Vikingfestivalen som dei siste åra har vorte ei familieramme rundt spelet.

– 1200 såg spelet. Det er fornøgde med. Og, det gjer at vi sit att med eit overskot på 25.000 kroner, fortel Kårstad.

Han reknar med at Gaularspelet omset for om lag 300.000 kroner. 170.000 av dette er billettinntekter, mens resten kjem frå sponsorar og tilskot.

Og når entusiasme hos dugnadsfolket bak spelet aldri har vore større, reknar Kårstad med nytt spell om to år.

– Dette har ikkje styret avgjort, men det har sjeldan vore så stor entusiasme blant gjengen. Og instruktør Idun Losnegård og Magnar Rutle har gjort ein fantastisk jobb med årets spel. Dei er flinke med folk, seier Kårstad.

Les meir om Gaularspelet i Firda tysdag.