I årsrapporten skriv pasientombod Ove Mjåtveit at Helse Førde bør skifte namn, fordi namnet er misvisande og truleg også provoserande for mange av innbyggjarane.

• Les denne saka og kommenter: Vil at Helse Førde skal skifte namn

Mjåtveit seier til NRK at han trur at eit nytt namn kan vere ein moglegheit til å starte på nytt, etter at sjukehusstriden har splitta fylket i fleire år.

Pasientombodet meiner at helseføretaket sitt namn må reflektere Sogn og Fjordane som ei eining.

Meir og meir presist
- All mogleg honnør til Mjåtveit for innspelet, spesielt at det er heile fylket, det skal leverast helsetenester til. Det er likevel ikkje namnet, men politikken som er problemet, skriv Egil Melvær i kommentarfeltet på firda.no.

Han meiner at krinsen rundt Førde sentralsjukehus framleis vil ha full kontroll, og tvilar på at ei namneendring vil føre til at dei legg om.

- Til denne tid er Helse Førde blitt eit meir og meir presist namn, skriv Melvær, og legg til at han ønskjer ei namneendring velkommen dersom leiinga opptrer som eit Helse Sogn og Fjordane.

Vil ha nytt leiarskap
- Eit helseføretak for heile Sogn og Fjordane finst ikkje. Kvifor skal det då heite Sogn og Fjordane helseføretak, spør Svein-Rune Krakereid.

Aase L. skriv at ein forstår lite av kva som har skjedd dei siste åra, dersom ein trur at alt vil ordne seg, og ein kan begynne på nytt, berre med å skifte namn.

- Vi treng ny leiarskap, nye kostar, skriv ho.

Ingvar Torsvik Myrvollen meiner innspelet frå Mjåtveit er veldig fornuftig.

- Dette ville vore eit lite, men viktig bidrag, til å redusere frontane litt, skriv Myrvollen.

Meiner namn er uinteressant
Sverre Andersen meiner at det er uinteressant kva ein organisasjon heite

- I staden for å bruke tid på namn, burde ein heller fokusere på rammevilkår og kvaliteten på tenestene som vert levert, skriv Andersen.

• Kva meiner du. Sei meininga di i kommentarfeltet under denne artikkelen.