Det skriv Sunnmørsposten si nettutgåve.

Daniel Haga, medisinsk direktør i Helse Midt-Norge, seier til avisa at dersom eit samarbeid med Helse Førde fører til styrking av grunnlaget for fødeavdelinga i Volda, trur han ikkje det vil vere aktuelt å leggje ned fødetilbodet. Alternativet er nedlegging av avdelinga i Volda, og for så å samle alt i Ålesund i 2020.

Felles tilbod for Nordfjord og Søre Sunnmøre?

Torsdag blir eit høyringsutkast om funksjonsfordelinga mellom sjukehusa i helseregionen vedteke av styret i Helse Midt-Norge. Parallelt har Helse Sunnmøre sin eigen Strategi 2015 på gang.

I samband med det pågåande strategiarbeidet har det vore tingingar med Helse Førde med tanke på ei samordning av framtidig sjukehustilbod for innbyggjarane i både i Nordfjord og Søre Sunnmøre. Eit sentralt spørsmål er kva som vil skje med fødeavdelingane ved sjukehusa på Eid og i Volda, skriv avisa.

Bolstad: – Skal vere ein open prosess

Administrerande direktør i Helse Førde, Jon Bolstad, ønskjer førebels ikkje å kommentere utfallet av tingingane med Helse Sunnmøre.

– Det som skal seiast om modellvalet i Helse Førde kjem tidlegast på fredag. Då er helseministeren her og vi skal ha eit stort dialogmøte med folkevalde frå heile fylket. Eit eventuelt innspel til Helse Sunnmøre blir tatt med i dette. Dette skal vere ein open strategiprosess der dei som eig prosessen skal få lov til å seie noko om mål både på kort, mellomlang og lengre sikt før vi konkluderer, seier han til Sunnmørsposten.