Ein alvorleg sjuk mann frå Nordfjord vart før helga sendt heim frå Førde sentralsjukehus til ein søppelhaug.

Det var ei kvinne frå bygda han bur i som slo alarm etter at mannen hadde ringt henne og bede om hjelp til å rydde litt opp i huset før han skulle heim frå sjukehuset, skriv Bergens Tidende.

Stinkande boss og frose vatn
Synet som møtte kvinna då ho kom til mannen sitt hus, fekk henne til å kontakte Førde sentralsjukehus umiddelbart. Ho gav beskjed om at eit sjukt menneske ikkje kunne sendast heim til eit slikt hus.

Heile huset var fullt av gammalt stinkande boss og vatnet var frosse.

Kvinna er sjokkert over at ikkje sjukehuset tok hennar oppmoding til følgje, og vil ha Fylkeslegen si vurdering av saka.

Sjukehuset tek ikkje sjølvkritikk
Overlege Finn Johan Halvorsen ved Førde sentralsjukehus seier at det ikkje er sjukehuset sitt ansvar å finne ut korleis folk har det heime.

- Mannen har så vidt eg veit budd i dette huset heile sitt liv, og om han har mykje skrot heime angår ikkje den medisinske behandlinga, seier Halvorsen til Bergens Tidende.

Mannen vart måndag innlagt på eit anna sjukehus, etter å ha budd heime i huset i helga.