Ikkje alle har fått nytta det dårlege sommarvêret like godt som Sunniva Nordeide, Serge Bigwi og Ine Kjøsnes Raad i Førde.

Kvart million sider

Dei har nemleg lest seg til 1.–3. plass i biblioteket sin sommarkonkurranse SommarLes i konkurranse med mange andre born.

Samanlagt har alle borna lest 255 131 sider, altså ein kvart million sider.

Og dette er biblioteket veldig godt nøgde med, og førre laurdag markerte dei avslutninga på konkurransen med ein avslutningsfest.

Her møtte 120 born som var spente på kven som stakk av med 1.–3. – plass.

Og med 8237 sider stakk altså Sunniva Nordeide av med førsteplassen, ho blei lønna med ein iPod nano. På andreplass kom Serge Bigwi med 7048 sider og tredjeplassen tok Ine Kjøsnes Raad med 6877 sider. Premiane for desse var bøker, badebillett og DVD, fortel biblioteket.

Premiar i fleng

Den nye einingsleiaren for kultur, Johan Bengtsson opna festen med ein flott fanfare for deltakarane. Også ordførar Nils Gjerland var til stades.

Målet med konkurransen SommarLes var å få barn til å lese, og alle som hadde lese over 200 sider fekk vere med i trekninga av premiar.

Ni born har lese meir enn 5000 sider i sommar, desse fekk også premie i konkurransen som blei arrangert for første gong.

Neste sommar blir det også SommarLes, lover biblioteket.