I Førde er det verken ungdommens bystyre eller ungdomsråd som jobbar opp mot politikarane. I fylkessenteret er det ein vaksen som talar ungdommen si sak.

- Det vert feil at det ikkje er ungdommar sjølve som skal seie kva dei meiner, seier elevar ved Førde ungdomskule til Firda.

Førde-ungdommen trur eit eige ungdommens bystyre ville vore nyttig for å få på plass fleire tilbod i fritida deira.

- Drit i ungdommen
- Det er for gale at den største kommunen i fylket ikkje har eit eige ungdommens bystyre. Kommunen drit i ungdommen. Ved å velje ein vaksen til representant, viser dei ikkje respekt, seier fylkesformann Erlend Bøe i Fremskrittspartiets Ungdom (FpU).

Bøe kjem sjølv frå Flora, der dei nyleg feira ti år med ungdommens bystyre.

Ventar på ungdommen
Gruppeleiar Jorunn Eide Kirketeig i Førde Ap ønskjer å få på plass eit bystyre for ungdommar, og fortel at det er sett av midlar til dette.

Ifølgje Kirketeig er det berre engasjement frå ungdommane sjølve som no må til for å etablere dette organet.