Firmaet, som Britt Merete driv saman med bror sin, har fått namnet Aase video og grafikk. Dei to satsar i hovudsak på å yte marknadsføringstenester for bedrifter og andre kundar, til dømes å lage brosjyrar og informasjonsfilmar.

I tillegg er Britt Merete dagleg leiar for Gaular Næringshage.

– Sjølv om flesteparten av jobbane i min bransje er i Oslo, hadde eg lyst heim, og prøve å drive mi eiga bedrift herifrå. Det er spennande. Av og til lurer eg på om eg er heilt gal, eller om eg er på sporet av noko, seier 25-åringen.

Kule bilete

Britt Merete er også med i eit team som driv med storskjermproduksjon. Teamet følgjer Impact World Tour (IWT), som er ein del av misjonsorganisasjonen Ungdom i oppdrag, på turne rundt om i Europa.

– Vi filmar under showa til IWT, og viser filmen direkte på storskjerm. Vi legg også grafikk på filmen, slik at det vert eit slags multimediashow, forklarer Britt Merete.

Medan ho har kontor i næringshagen i Gaular, jobbar bror hennar frå Bergen. Britt Merete står for videoproduksjonen i firmaet, broren for det grafiske arbeidet.

Lokale kundar

– Vi kan ta på oss dei fleste oppdrag, men vi ser at marknadsføring har det største potensialet, seier ho, og fortel at hovudtyngda av kundane hennar er frå Sogn og Fjordane.

Saman med seg i næringshagen, har den daglege leiaren fått ein fast tysdagskafe, og ein fotpleiar annan kvar tysdag. Og det vert jobba med å få fleire aktørar inn i dei trivelege kontorlokala.

– Meininga med næringshagen er å danne eit kontorfellesskap, og eg håper og ønskjer at det vil verte slik snart, smiler Britt Merete.