– Bading og ferdsel langs sjøen er ein av dei viktigaste friluftsaktivitetane i Norge, og viktig for helsa, seier FRIFOs generalsekretær, Lasse Heimdal.

Han påpeikar at det som likevel er skremmande er at så mange born ikkje kan symje. Mange liv kunne vore spara gjennom betre opplæring i symjing og bruk av redningsvest. – FRIFO støttar difor kravet om at grunnskuleelevar skal tilbys symjeopplæring inntil dei faktisk er i stand til å symje, seier Lasse Heimdal.

Kan ikkje symje

Tal frå Gjensidigestiftelsen syner at halvparten av dagens tiåringar ikkje er i stand til å symje.

Statistikk frå Norsk Folkehjelp syner at 973 menneske drukna i periode 2002–2011.

Pr. 1. august i år syner statistikken ei nedgang i drukningsulukker frå 45 til 33, samanlikna med same periode i fjor.

Treng grunnleggjande opplæring

Ein trur at nedgangen i år er grunna dårleg vêr og få større ulukker. – Men vi kan ikkje basere oss på at dette vil vere trenden i åra som kjem. Ei grunnleggjande opplæring i symjeferdigheiter og ferdsel i båt og langs kysten er viktig for både helse og trivsel.

Tek ein dei rette førehandsreglane og nyttar redningsvest er det både trygt og sunt å vere på og ved sjøen, seier Heimdal.

Det er viktig at både skule, familie og frivillige organisasjonar samarbeider for å auke tryggleiken og skape meir friluftsglede, blant anna ved å styrkje ferdigheiter i symjing, padling og roing.