Camilla Opheim Mæland var saman med systra for å sjå på Bøyabreen i Fjærland, men fekk ei illeluktande oppleving då ein septikbil byrja å tømme væske like ved elvekanten. Ho seier til NRK at det stinka kloakk medan tømminga gjekk føre seg.

– Eg blir sint av å sjå slik. Det er jo om å gjere å ta vare på naturen, ikkje å øydeleggje den. Når du er på ein bre er ikkje synet av ein septikbil som står og tømmer seg det synet du ventar og sjå, seier Opheim Mæland til NRK.

Nektar for ureining

Eigaren av bilen er Gunnar Følid frå Vik. Han er tidlegare bøtelagd for ulovleg forureining, men hevdar at det ikkje var kloakk han dumpa ved breen.

Følid hevdar å ha spylt tanken, og at det han slapp ut var vatn som hadde vore i tanken etter dette. Sjølv om vatnet var i septiktanken, hevdar han at det var reint.

Bakteriar

Opheim Mæland har ikkje tru på at vatnet var reint.

- Uansett kva det var han tømte, så ligg det mykje bakteriar og alt muleg anna i tanken. Det må jo vere skadeleg, seier ho til NRK.

NRK har vore i kontakt med bransjefolk som seier at septikbilar skal reingjerast på godkjende stader for ureina stoff, og at dei aldri før har høyrd om ein slik praksis som Følid hevdar å drive med.