21-åringen frå Naustdal er vald inn på fast plass i kommunestyret, men melde seg ut av Arbeidarpartiet i slutten av april og kjem til å halde fram som frittståande folkevald.

Vil på Stortinget

Piratpartiet vart stifta i Sverige og har etablert seg i fleire titals land.

I Norge er partiet ferskt og ei gruppe eldsjeler jobbar no for å samle 5000 underskrifter for å kunne registrere det i Brønnøysund-registeret og stille lister ved stortingsvalet neste år.

Namnet på partiet er inspirert av The Pirate Bay, omstridd svensk nettstad for nedlasting av gratis musikk og film.

Kjerneprogrammet for partiet har overskrifta «Digital revolusjon» og det vert slege fast at målet er å erstatte gamle monopol og lukka, offentlege hierarki med digitalt innsyn og gjenbruk av offentlege data.

– Internett vart starta som eit anarki og vil aldri bli noko anna enn eit anarki.

På nettet deler ein alt, og det fungerer, seier Solheim som ikkje er motstandar av ein kvar køyreregel på nett.

Naustedølingen fortel at han brukar meir tid på nettet enn til å sove.

– Ikkje berre for nerdar

– Eg les, skriv og er sosial på nettet, så mange vil nok meine at eg er asosial, seier han.

Han forklarer utmeldinga frå Arbeidarpartiet med at han siste to åra har blitt meir liberal.

Dessutan mislikte han det han opplevde som einsretting og posisjonering internt i paritet. Nye impulsar og ny kunnskap ikkje minst frå utanlandske nettstader har også endra hans politiske syn.

Solheim innser at kjerneprogrammet til Piratpartiet kan verke «nerdete», men han legg vekt på at krava gjeld dei fleste av oss, og slett ikkje berre datanerdane.

– Kva ambisjonar har du sjølv?

– Eg har ikkje personlege ambisjonar, men eg har ambisjonar for partiet. Eg hadde heller ikkje ambisjonar om kommunestyret, men vart beden om å stille opp, og det same gjeld no, seier Solheim, som jobbar som nattevakt på Førde Hotell.

– Målet mitt er å starte på ei av IT-linene på Høgskulen i Gjøvik neste haust, seier 21-åringen.